SELO BOA PRÁCTICA Leer.es

O Centro Virtual Leer.es concede o Selo de "Boa Práctica Iberoamericana" para recoñecer as propostas didácticas de todo o ámbito iberoamericano que contribúen a desenvolver a competencia en comunicación lingüística. Hoxe coñeciamos que acaban de otorgarnos o Selo ao blog da nosa biblioteca. Se premes na fotografía poderás coñecer os motivos desta mención.

 

Parabéns a todos os lectores desta quinta por este recoñecemento. Grazas por conseguir que día a día a biblioteca estea viva e que agromen novos éxitos.

E agromou outro premio

No mes de xuño presentábamos o noso proxecto "E agromará outro bosque" a un Concurso de Traballo por Proxectos, coordinados ou coa participación da biblioteca escolar. Hoxe saiu a resolución na que descubrimos que o noso centro é un dos galardoados. Así que estamos de noraboa. 

Este proxecto é o resultado do traballo de todo o alumnado do centro, que participou activamente nas actividades propostas. Grazas a todos os que co seu traballo e dedicación sacaron adiante este proxecto.

Parabéns a todos por este recoñecemento!

Historia dunha buxaina

Esta historia comeza o día 3 de maio cando coñecemos que somos finalistas dos VIII Premios Espiral Edublogs por segundo ano consecutivo. E o 17 comunícannos vía twitter que gañamos un dos tres premios.  
Dende ese día no colexio formouse unha expedición que tiña unha misión moi importante: ir a Madrid a buscar a nosa buxaina. Así que o 13 de xuño a expedición púsose en marcha...

O sábado 14 tiñamos unha cita coa Asociación Espiral Edublogs.

 Foi unha mañá de tensión e emoción... para os que alí estaban e

 para os que non puideron ir.

E chegou o momento. A quinta gaña o 1º Premio: a buxaina de ouro.

Misión cumplida!

 E compartiron escenario cos demais gañadores.

O luns a buxaina chegou á nosa quinta.

Aquí está....

Premio para o noso blog

Somos gañadores do PREMIO ESPIRAL EDUBLOGS na súa VIII EDICIÓN, na categoría de blogs bibliotecas escolares. Coñecemos a noticia vía twitter. Os alumnos dos Programas de Capacitación Profesional Inicial Especial de Navarra eran os encargados de anunciar os nomes dos premiados.  Grazas rapaces por comunicarnos a boa nova. E grazas ao xurado por concedernos este premio e recoñecemento.

 

Lectores e usuarios da Quinta dos libros, parabéns!

Felicidades a cada un de vós e grazas. Sodes os protagonistas desta biblioteca que traballa día a día para que os nenos e as nenas do Rosal gocen das historias, dos libros, da ilusión... Este recuncho na rede é voso e este premio é para vós. 

Este premio é voso

Hoxe o centro cheiraba a premio. As felicitacións e os sorrisos bulían polos corredores. E moitos foron á biblioteca a ver o diploma e a figura. Algúns viñeron de visita ao centro a recoller o seu título de secundaria e coñecían a noticia.

Grazas a Genma, a Javi, a Bea e a Eva pola visita!

Este premio tamén é voso, dos que non estades, alumnado e profesorado que sementou nesta Quinta que agora da novos froitos. 

Parabéns!

O noso primeiro premio

Onte celebrouse en Rianxo a entrega XXIII Entrega de Premios "Irmandade do libro". A federación galega de libreiros quere render homenaxe aos que destacaron durante o ano 2013 polo fomento da lectura e dos libros. 

Estes foron os galardóns:  a autora Chus Pato; o Libro do Ano, "Ulises" de James Joyce, traducido e publicado por Galaxia;  a Obra Editorial para a colección "Cociña infantil e familiar" da editorial Ouvirmos. O premio de Fomento da Lectura levouno a Biblioteca Municipal Valle-Inclán (Redondela); o de Libraría recaeu na Ramón Cabanillas (Cambados); mellor Libro Infantil e Xuvenil do Ano 2013, foi para a "Triloxía Ámote Leo", de Rosa Aneiros, publicada por Edicións Xerais de Galicia. E o Centro de Ensino o noso, o CPI Manuel Suárez Marquier do Rosal.

Todos os premiados recibimos unha figura exclusiva realizada en bronce deseñada polo lucense Ismael López e un diploma. Ademais nos deron un cheque para mercar libros en calquera das librarías asociadas.

Parabéns a toda a comunidade educativa polo bo traballo, a  dedicación e a ilusión que poñedes en cada unha das actividades que levamos a cabo. Grazas por facer visible día a día os libros e a lectura no noso centro.