Pequenos grandes contadores

Os máis novos do centro contáronlle o conto en inglés, Brown bear, Brown bear aos "maiores" de 4º da ESO A. Un libro para traballar vocabulario de cores e animais, ademais de permitirlle ao alumnado ir interiorizando, a base da repetición, algunhas estruturas gramaticais.

A "teacher" botounos unha man e todo saiu estupendamente.

Unha actividade máis da Semana do Libro, na que colaborou o Departamento de Inglés.

"O importante é ler e ler: clásicos ou modernos, libros en español ou noutro idioma..."

Josefina Aldecoa

Experiencias compartidas

Na biblioteca hai lugar para aprender idiomas, e non só mediante os libros, senón que tamén a través da práctica.

Alumnos e alumnas de Secundaria empregaron distintos espazos da Quinta para desenvolver clases de inglés.

María Carrera, de 4º de ESO,  impartiu unha clase ao alumnado de 3ºB de Primaria, con vocabulario das partes da casa en inglés.

Outra clase, máis doce se cabe, foi a que houbo na cociña- laboratorio. Alumnos de 4º de ESO prepararon un brownie aos seus compañeiros, explicando a preparación na lingua inglesa.

E Dani Zarco, alumno de 4º de ESO, trouxo a maxia á biblioteca facendo varios trucos, onde tivo que desenvolver a súa rapidez, axilidade...e tamén a súa soltura en inglés.

Quen non soñou algunha vez con chegar á lúa?

O voluntariado da biblioteca achegou este astro, a través dunha escenificación con monicreques, aos raparigos e raparigas das escolas de Novás e Fornelos, do CRA María Zambrano.

A que sabe a lúa é un conto dirixido aos primeiros lectores, que ensina o valor do traballo en grupo para conseguir un obxectivo común. Todos somos necesarios para acadar un mesmo fin, a pesar das diferenzas que aparentemente poida haber entre nós.

"Sós podemos facer moi pouco, unidos podemos facer moito"

Hellen Keller

Cartas de inverno

Unha clase de inglés distinta foi a que tivo o alumnado de 3ºA de Primaria na biblioteca. As encargadas de organizala foron Iria, Azucena e Leticia, alumnas de 4º de ESO. Prepararon un concurso adaptado ao nivel dos cativos e cativas, onde repasaron vocabulario relacionado co tempo, coa roupa, días da semana, partes do corpo...

Unha actividade na que os estudantes de ambas etapas educativas saíron reforzados.

Por outra banda, esta mañá Xosé Tomás visitou as escolas de Pías, Fornelos e Novás, do CRA María Zambrano, para realizar co alumnado obradoiros de ilustración.

E se non sabes que facer estes días de choiva, Julián Castro de 4ºB de ESO pode botarche unha man.

" A literatura ensinoume a vivir e a morrer. A facer a guerra e a perdela. A amar e desamar. A comprender que a mente humana esta feita dunha substancia formada de palabras, música, segredos e silencios"

Nuria Amat

Linguaxes na biblioteca

A miúdo xúntanse na biblioteca varias linguaxes (escrita, oral, audiovisual...). Hoxe foi un deses días nos que na Quinta dos Libros se contemplaron moitas das linguaxes que posibilita ao alumnado a oportunidade de aprender:

 Sara Flores, Sara González, Miriam Alonso e Alexis Pérez, alumnos de 4º de ESO, contáronlle o conto The three little pigs ao alumno de 1º de Primaria.

Esta maña tivo lugar a derradeira clase de MatDance para o alumnado de 3º de Primaria durante este curso. A sesión estivo enfocada no tempo e nas horas a través da expresión corporal.

Que ben o pasaron. Moitas gracias, Mercedes!

Durante toda a semana poderemos desfrutar das ilustracións de estilo manga da xove ilustradora fenesa, Mariña Gándara. A exposición rematará coa visita da autora o vindeiro venres.

"A primeira tarefa da educación é axitar a vida, pero deixala libre para que se desenvolva"

María Montessori

Danza e Ciencias na biblioteca

Os nenos de 3º Primaria tiveron esta mañá a segunda das catro sesións de MatDance que imparte durante este mes a profesora de danza, Mercedes Prieto. A clase de hoxe centrouse na aprendizaxe das táboas de multiplicar e a expresión corporal.

E esta mesma tarde Olimpia Alcaraz, responsable do laboratorio, ofreceunos a parte do profesorado unha clase de formación para ir familiarizándonos con esta nova dependencia da biblioteca.
Esta primeira sesión estivo enfocada no uso do microscopio, concretamente na preparación dunha mostra vexetal (cebola), para despois observala a través do ocular.

"Non esquezas que o coñecemento científico pódelo atopar nas bibliotecas, sempre boas compañeiras"

Peregrina Quintela

MatDance

Hoxe tivo lugar a primeira das catro sesións de MatDance que vai impartir Mercedes Prieto, profesora de Danza con máster en Ciencias da Educación, na Quinta dos Libros para o alumnado de 3º de Primaria. 

Trátase dun proxecto basado nas conexións creativas que se establecen entre a Matemática e a Danza; unha maneira lúdica de desenvolver os contidos matemáticos a través da expresión corporal. 

Pasárono xenial experimentando fisicamente e traballando en equipo.

E mañá o alumnado de Secundaria xa poderá recoller na biblioteca a entrada para asistir a sesión de cine deste xoves.

"A arte potencia as capacidades intelectuais dos nenos e nenas"

M.J. Roldán