Obradoiro científico: "Falso ouro"

A semana pasada, para finalizar o mes da ciencia, tivemos o privilexio de que a mestra Mar, de física e química, fixera un experimento co alumnado da ESO no recreo. 

O que fixeron foi mesturar unha disolución de Ioduro de Potasio cunha disolución de Nitrato de Chumbo, formándose un precipitado de Ioduro de Chumbo dunha cor amarela intesa que parece Ouro!

Burbulla científica

Esta mañá, durante o recreo, varias axudantas da biblioteca de 5ºB transportaron ao alumnado de 2º de Primaria a unha burbulla científica.
Goya, Lucía, María, Dafne e Elisa realizaron dous experimentos sinxelos no Laboratorio Ángel Carracedo. 

Arco da vella con cacahuetes
Para o primeiro experimento só empregaron cacahuetes con chocolate de cores, auga e pratos brancos. 

 Colleron os pratos, botaron a auga e colocaron os doces nos seus bordes. Ao pouco tempo, os colorantes comezaron a disolverse e a expandirse polo líquido, creando unha composición moi vistosa.

Extracción de ferro dos cereais

O segundo experimento consistiu en ver a cantidade de ferro que teñen os cereais, unha comida que nos aporta unha boa fonte de enerxía cada día. Para iso, trituraron os cereais e despois achegáronlle un imán para extraer o ferro que contiñan.

"Son das que pensan que a ciencia ten unha gran beleza. Un científico no laboratorio é tamén un neno colocado cara fenómenos naturais que lle impresionan coma un conto de fadas"

Marie Curie

Danza e Ciencias na biblioteca

Os nenos de 3º Primaria tiveron esta mañá a segunda das catro sesións de MatDance que imparte durante este mes a profesora de danza, Mercedes Prieto. A clase de hoxe centrouse na aprendizaxe das táboas de multiplicar e a expresión corporal.

E esta mesma tarde Olimpia Alcaraz, responsable do laboratorio, ofreceunos a parte do profesorado unha clase de formación para ir familiarizándonos con esta nova dependencia da biblioteca.
Esta primeira sesión estivo enfocada no uso do microscopio, concretamente na preparación dunha mostra vexetal (cebola), para despois observala a través do ocular.

"Non esquezas que o coñecemento científico pódelo atopar nas bibliotecas, sempre boas compañeiras"

Peregrina Quintela

Na Quinta pasan cousas

Venres, 9:00 horas da mañá, un novo día no centro por escribir e unha xornada máis na que nos espazos da Quinta dos Libros comezan a pasar diferentes cousas:

Iria e Zaira, alumnas de 4º da ESO, explícanlles no laboratorio aos nenos e nenas de 3º de Primaria, a través dun experimento sinxelo, como é un líquido non newtoniano. Para iso só precisan fariña de millo (maicena) e auga. Á primeira vista trátase dun líquido coma calquera outro, mais unha vez que comezan a darlle golpes secos podemos apreciar como a mestura se mantén sólida, mentres que se sumerximos a man lentamente actúa coma un líquido.

Observamos tamén como algunha usuaria apura coas últimas respostas do concurso de investigación de mulleres científicas.

E para finalizar vemos desfilar a “comparsa” de mochilas cara as casas rosaleiras, quizais para compartir en familia as últimas lecturas do Entroido.

O resumo deste venres da Quinta, no seguinte vídeo:

"As bibliotecas son as portas de entrada ao Universo"

Jackie Anton 

A Biblioteca ou o lugar para xerar aprendizaxes

Esta semana a Quinta dos Libros énchese de actividades para conmemorar o Día da Muller e a Nena na Ciencia.

Por todos é coñecida a desigualdade de xénero existente nos sectores da ciencia. De aí a importancia de ofrecerlle aos nosos alumnos e alumnas, por igual, a oportunidade de desenvolver a vocación científica desde as primeiras idades.

Esta mañá, cinco nenas de 6º, Ángela, India, Lea, Nerea e Noa prepararon no Laboratorio "Angel Carracedo", dependencia máis da biblioteca, un obradoiro científico sobre a célula e o ADN , destinado ao alumnado de 5º de Primaria. 

Por outra banda, a biblioteca tamén dá a posibilidade de desenvolver o traballo cooperativo, compartindo recursos e espazos á vez que se realizan tarefas conxuntamente, nas que o alumnado se axuda e se anima á hora de aprender. Por este motivo,  como é o caso da materia de Inglés de Secundaria, teñen lugar diaramente clases lectivas na Quinta dos Libros.
Hoxe mesmo, investigaron en lingua extranxeira sobre mulleres científicas a través dos ordenadores e tablets. 

Podedes ver o resumo da xornada neste vídeo:

"As mulleres temos o mesmo potencial para facer ciencia. Non se lle dá as mesmas oportunidades nin se lles valora tanto coma aos homes"

Gabriela González

Burbulla da experimentación e manipulación

Como ben sabedes, a biblioteca dá a oportunidade de elexir e aprender situacións diferentes. Algúns dos usuarios da Quinta decidiron entrar hoxe na burbulla da experimentación e da manipulación.
É o caso dos nenos e nenas de 6º A, que quixeron repetir o experimento que o doutor Carracedo nos ensinara durante a súa visita ao centro. Pero desta vez, en lugar de extraer o ADN dun plátano, fixérono con amorodos, tal e como el nos recomendara.

Por outra banda, sinalar que os vindeiros días seguirán expostas as figuras que recompilan a vida e obra das mulleres galardoadas co Premio Nobel da Paz para seren vistas e manipuladas por tod@s vós.

" Os nenos e nenas necesitan explorar o seu mundo,manipular obxectos e investigar o que acontece na súa contorna"

V. Morillas

Día memorable

E rematamos, como non podía ser doutra maneira, recordando o acto protagonista desta semana na biblioteca.

Boa fin de semana!

"O importante non é ser o máis listo ou lista, senón ser feliz e tentar facer felices aos que nos rodean"

Ángel Carracedo

Laboratorio "Ángel Carracedo"

O pasado martes foi un deses días que non se esquecerá no centro. Os máis novos aínda non son realmente conscientes da importancia da súa visita pero o día de mañá poderán apreciar e dicir que compartiron unha xornada co científico galego de maior proxección mundial, D. Ángel María Carracedo Álvarez.


A primeira parada tivo lugar na biblioteca. O doutor pasou ao laboratorio e foi sorprendido polos alumnos e alumnas de 4ºA de Primaria que realizaban unha experiencia de cromatografía. Entón foi cando lles comezou a explicar, coma se dun conto se tratase, en que consistía o seu traballo de xenetista e, ante o agrado de todos os asistentes, suxeriu realizar un experimento improvisado: a extracción de ADN dunha mazá e plátano.

Momento do experimento, ante a atenta mirada de Xosé Tomás Díaz, Olimpia Alcaraz e o alumnado de 4ºA.

                             

Representantes da Consellería e Concello , xunto co alumnado, escoitando a Carracedo.

Despois descubriu a placa do laboratorio, que desde o martes, leva o seu nome. 

Laboratorio "Ángel Carracedo"

A xornada tivo a segunda parada nun repleto Auditorio de O Rosal con membros de toda a comunidade educativa que non quixeron perder a oportunidade de escoitar a este brillante científico.

O alumnado de 4ºA de Primaria fixo un vídeo sobra a traxectoria do científico.

Momento da súa charla.

Falounos de diversos temas que pronto capataron o interese de todos os presentes:
Fixo un repaso pola súa vida, desde unha feliz infancia ata as súas últimas achegas ao mundo da ciencia. Explicounos, eludindo todo tipo de palabras técnicas, como se creou a vida, o que era o xenoma humano, exemplos do que se pode conseguir co ADN, investigacións nas que participou, falounos do grupo de traballadores que ten... Incluso nos contou que, desde sempre, unha das súas grandes paixóns era o mar, ata o punto en que houbo un tempo no que se planteou ser fareiro... E aínda que non oriente as embarcacións, estamos seguros de que é e será o guía de moitas persoas que coma el teñen o gusto pola investigación.


Non quixemos perder a oportunidade de coñecer, a través de preguntas de representantes de pais/nais e alumn@s, aspectos das súa traxectoria profesional e as súas reflexións sobre o mundo da Educación. 

Os representantes de alumn@s, de pais e nais,  xunto coa moderadora do coloquio, Dolores Sánchez.

E rematou a xornada como a el lle gusta... interactuando coa xente.

 "Se un ten ilusión, traballa e persegue os seus soños, sempre terá oportunidades na vida"

Ángel Carracedo

Ángel Carracedo, semblanza dun científico

Non todos os días se ten a oportunidade de escoitar a un científico de proxección internacional coma Ángel Carracedo. Por iso queremos facer fincapé na importancia que para todos ten a súa visita.

Agardámosvos!

"Divulgar a ciencia é o máis bonito que hai"

Ángel Carracedo